Alba Vázquez Botana (1º Bach) fai de magnífica cronista da primeira charla, cos maiores:
Hoxe recibimos no instituto a Antía Yáñez, unha escritora moi noviña, pero cunhas obras de gran calidade, entre elas, Senlleiras. Esta novela escrita en lingua galega foi unha das últimas que limos o alumnado de 4º da ESO e 1º de Bacharelato, e na que se centrou a autora na charla. Comezou explicándonos en que se inspirou para escribir o libro e como a sociedade na que se criou a levou a tratar certos temas na obra. No encontro con Antía falamos sobre todo do machismo, deténdonos a ler noticias da prensa pasada e actual, tendo todas un aspecto común, o asasinato de mulleres a mans de homes.
Tamén viaxamos aos anos vinte na Coruña, observado en imaxes os espazos nos que está ambientada a novela. Rematamos facéndolle unha serie de preguntas e prestándolle os libros para que nolos asinase.
Sen dúbida, foi un encontro do máis agradable, xa que Antía se amosou moi próxima e atenta, e ademais abríunos máis os ollos sobre a realidade que nos rodea animándonos a mellorala.
E o axudante de biblioteca Yucef Sobhi (1º ESO A) descríbenos emocionado o que máis lle chamou a atención da segunda das charlas:
Antía Yáñez contounos de onde lle saían as ideas. En concreto contounos sobre os nenos protagonistas de O misterio de Portomarín, que lle foron inspirados por uns veciños que eran tres irmáns e unha irmá. Do can contou que de pequena sempre quixo ter un e transformou o desexo nun personaxe. Agora xa ten can e outros animais.
O de Portomarín ten que ver con que ela visitaba este pobo de pequena e entresoñaba con buscar tesouros alí. E, respecto ao final dixo que sería en exceso bonito que acabaran atopando o que buscaban, así que engadiu algo máis [pero non o desvelamos para que o leades...].
Moitas grazas a Antía polas súas obras e pola súa disposición a compartir con nós, á profe Xulia R. Abella por invitala e a todos e todas as participantes por conseguir crear un agradable ambiente para unhas boas charlas.
Comentarios
Publicar un comentario